សេចក្តីអំពាវនាវ
សេចក្តីអំពាវនាវ
គណបក្សសម្ព័ន្ធដើម្បីប្រជាធិបតេយ្យ (គសប) ត្រូវបានបង្កើតឡើងនៅក្នុងឆ្នាំ២០០៦ ដោយមានបាវចនា “រួមគិត រួមធ្វើ និងរួមទទួលខុសត្រូវ*” ក្នុងគោលបំណងទៅកាត់បន្ថយអំណាចរដ្ឋ និងបង្កើនអំណាចរាស្រ្ត និងគោលដៅឆ្ពោះទៅបង្កើតសង្គមកម្ពុជាដែលពលរដ្ឋរស់នៅ ដោយស្មើភាពគ្នាក្នុងភាពជាម្ចាស់។ រាល់សកម្មភាពផ្សព្វផ្សាយពន្យល់របស់គសប ទោះក្នុងវេទិកាជួបជាមួយនឹងអ្នកគាំទ្រ និងសមាជីក កសប ក្តីទោះក្នុងការផ្សាយបន្តផ្ទាល់តាមវិទ្យុក្តី ឬបន្ទប់ Paltalk Koun Khmer ក្តីផ្តោតលើគោលធំៗបី ៖ សាបព្រោះគ្រាប់ពូជប្រជាធិបតេយ្យ ទាញយកប្រយោជន៍ពីកិច្ចបដិបត្តិព្រះធម៌ និងដាំបណ្តុះសីលធម៌សង្គម។
តាមរយៈការពន្យល់ផ្សព្វផ្សាយគោលធំៗទាំងបីនេះ មនោគមវិជ្ជា និងទស្សនៈវិស័យថ្មីក្នុងការដោះស្រាយបញ្ហាក្នុងគ្រួសារ និងសង្គមខ្មែរ ត្រូវបាន សាបព្រោះទៅក្នុងសង្គមហើយមានឥទ្ធិពលលើការផ្លាស់ប្តូរផ្នត់គំនិត និងជីវិតរស់នៅរបស់មនុស្សខ្មែរច្រើននាក់ មកពីគ្រប់និន្នាការនយោបាយ។ ឥទ្ធិពលរបស់គសប កំពុងតែមានលើពលរដ្ឋទាំងឡាយណា (១) ដែលចង់ឃើញសង្គមខ្មែរបដិបត្តិព្រះធម៌ជាមេរៀនត្រាស់ដឹងរបស់ព្រះពុទ្ធ ជាជាងជំនឿបែបសាសនា (២) ដែលចង់ឃើញសង្គមខ្មែរជាសង្គមមានសេរីភាព យុត្តិធម៌ នៃការទទួលភោគផលធម្មជាតិរបស់ខ្មែរ យុត្តិធម៌ តាមផ្លូវតុលាការ និងរីកចម្រើនផ្នែកលោកសម្ភារៈ (3) ដែលមានគំនិតស្នេហាជាតិស្នេហាបូរណភាពដែនដី និងចង់បានការអនុវត្តលទ្ធិ ប្រជាធិបតេយ្យតាមគន្លងលោកខាងលិច និង(4) ដែលចង់នាំទីអវសានដល់ចរិតនយោបាយទុច្ចរិត ពិសេសប្រព័ន្ធអំណាចប្រមូលផ្តុំនៅកម្ពុជា។
គសប តែងជំរុញឲ្យមានការចូលរួមលើគ្រប់រូបភាពពីពលរដ្ឋគ្រប់រូបដែលបានគំាទ្រ ឬនឹងគាំទ្រសកម្មភាពគសប។ សេចក្តីអំពាវនាវនេះផ្តោត ជាពិសេសឲ្យមានការចូលរួមចែករំលែកចំណេះដឹងពីអ្នកដែលស្តាប់យល់អំពីទស្សនៈនៃការធ្វើនយោបាយរបស់ គសប។
គសប កត់សម្គាល់ឃើញថា កន្លងមក ក្នុងវេទិកាដែលរៀបចំដោយគសបនៅតាមភូមិឋាននានា និងការិយាល័យរបស់ គសប ការផ្សាយបន្តផ្ទាល់ តាមវិទ្យុ និងការផ្សាយតាមគេហទំព័ររបស់ខ្លួន បងប្អូនដែលជាអ្នកយល់/គាំទ្រ និងសមាជិក គសប បានឡើងសម្តែង និងចែករំលែកនូវមតិយោបល់ និងដំណោះស្រាយល្អៗ ពាក់ព័ន្ធនឹងជីវិតរស់នៅប្រចាំថ្ងៃ សាសនា នយោបាយ ។ល។ ទាំងនេះគឺជាសក្ខីកម្ម ឬទីបន្ទាល់ ដែលមានតម្លៃនឹងចងក្រងទុកជាឯកសារនៃសមិទ្ធផល គសបផង និងការរីកចម្រើនផ្នែកគំនិតរបស់ប្រជាពលរដ្ឋទូទៅក្នុងគ្រានីមួយៗផង សម្រាប់ជាប្រយោជន៍ដល់មនុស្សជំនាន់ក្រោយសិក្សារៀនសូត្រផលប្រយោជន៍ប្រវត្តិសាស្រ្ត វប្បធម៌ចែករំលែក និងដើម្បីអាចបម្រើជាកម្លាំងជំរុញទឹកចិត្តដល់មនុស្សខ្មែរទូទៅ។
ដើម្បីផ្តល់វេទិកាឲ្យមានការចូលរួមកាន់តែច្រើនឡើងពីពលរដ្ឋក្នុងគ្រួសារ គសប និងចងក្រងការចូលរួមទាំងនេះជាលាយលក្ខណ៍អក្សរ។ គសបសូមអំពាវនាវដល់ពលរដ្ឋទាំងអស់ឲ្យសរសេរអំពីបទពិសោធន៍ និងទស្សនៈរបស់បងប្អូន ពាក់ព័ន្ធទៅនឹងសកម្មភាពរបស់គសប តាមគ្រប់ទម្រង់ និងគ្រប់ប្រធានបទ។ ការចែករំលែកទាំងអស់នេះនឹងជួយគសបឲ្យបំពេញសកម្មភាពរបស់ខ្លួឲ្យកាន់តែទូលំទូលាយផង និងជួយពលរដ្ឋឲ្យរស់នៅបានសេចក្តីសុខសម្រាប់បច្ចុប្បន្នភាពផង។
សក្ខីកម្ម ឬទីបន្ទាល់របស់បងប្អូនអាចសរសេរជាភាសាខ្មែរក៏បាន ភាសាអង់គ្លេសក៏បាន។ ឈ្មោះ និងអាសយដ្ឋានទំនាក់ទំនងនឹងត្រូវបានផ្សព្វផ្សាយវៀរលែងតែមានការបញ្ជាក់មិនចង់ឲ្យមានការផ្សព្វផ្សាយ។ សក្ខីកម្មទាំងនឹងត្រូវបានបង្ហោះទាំងស្រុង និងក្នុងទ្រង់ទ្រាយដើមនៅលើគេហទំព័ររបស់គសប។
ប្រសិនបើមានលទ្ធភាព និងការគាំទ្រគ្រប់គ្រាន់ យើងខ្ញុំនឹងបោះពុម្ពការចងក្រងសក្ខីកម្មទាំងនេះជាសៀវភៅមួយឆ្នាំម្តង ឬបញ្ចូលក្នុងទំព័រនៃព្រឹត្តិបត្រគសប ដើម្បីបងប្អូនអាចរក្សាទុកជាឯកសារសិក្សាស្រាវជ្រាវផ្ទាល់ខ្លួន និងពង្រីកការផ្សព្វផ្សាយឲ្យទៅដល់ពលរដ្ឋ នៅតាមស្រុកស្រែចម្ការ ដែលមិនមានការប្រើប្រាស់គេហទំព័រ។
បងប្អូនអាចផ្ញើសក្ខីកម្មរបស់បងប្អូនតាមសារអេឡិចត្រូនិក info@camldp.org ឬ camldp3@gmail.com ឬផ្ញើ តាមសមាជិក ឬទីស្នាក់ការ ឬការិយាល័យ សាខា គសប ឬប្រគល់ជូនដល់ក្រុមការងារ គសប ពេលមានវេទិកា ជួបជាមួយអ្នកគាំទ្រ និងសមាជិកនៅតាមតំបន់បងប្អូន។
ធម្មទានឈ្នះអស់ទានទាំងឡាយ។ ដោយការចូលរួមជាមួយគសប ក្នុងយុទ្ធនាការនេះ បងប្អូនចូលរួមសរសេរទំព័រថ្មីមួយនៃការអភិវឌ្ឍផ្នត់គំនិតខ្មែរក្នុងសង្គមកម្ពុជា។
ក្រុមព័ត៌មាននៃគសប
—–
* “រួមទទួលខុសត្រូវ” ត្រូវបានធ្វើវិសោធនកម្មមកពី “រួមសម្រេច” នៅក្នុងសមាជគណបក្សឆ្នាំ២០១១
