គណបក្ស សម្ព័ន្ធដើម្បីប្រជាធិបតេយ្យ
រួមគិត   រួមសម្រេច   រួមធ្វើ

Last update: 05/September/2010
 GkSrmanbBaða cucTIenH
ប្រសិនបើលោកអ្នកមាន ចំងល់ ឬ ចង់ពិភាក្សា ឬមានគំនិត កែលំអ សូមលោកអ្នក ចុចទីនេះ។
អំពីគ.ស.ប ទិសដៅគណបក្ស បច្ចុប្បន្នភាព សារសំលេង ការចូលរួមវិភាគទាន វិភាគទានស្មារតី
ទំនាក់ទំនងគណបក្ស
ប្រវត្តិគណបក្ស
គណៈ​កម្មាធិការ​អចិន្រៃ្តយ៍
លក្ខន្តិកៈគណបក្ស ព័ត៌មាន​អំពី​ការ​រួប​រួម

ល័ក្ខន្ដិកៈគណបក្ស


    យើងខ្ញុំសូមស្វាគមន៍ និងកោតសរសើរដោយស្មោះចំពោះមតិយោបល់នានា លើ សេចក្ដីស្នើធ្វើវិសោធនកម្ម មាត្រាមួយចំនួននៃលក្ខន្ដិកៈរបស់គណបក្ស សម្ព័ន្ធដើម្បី ប្រជាធិបតេយ្យ ដូចខាងក្រោមនេះ មុនពេលដាក់ជូនអង្គសមាជពិនិត្យ និងសំរេច ។

បុព្វកថា

  • ដោយបានរងទុក្ខវេទនាសព្វបែបយ៉ាង ក្នុងជីវិតរស់នៅក្រោមរបបនយោបាយរណបបរទេស គ្មានប្រជាធិបតេយ្យ នឹងផ្ទុយប្រជាធិបតេយ្យ ជាពិសេសក្នុងរបបប្រល័យពូជសាសន៍ពីឆ្នាំ ១៩៧៥-១៩៧៩
  • ដោយធ្លាប់បានទទួលការឈឺចាប់ពីការឈ្លានពានត្រួតត្រានិងបំផ្លិចបំផ្លាញពីសំណាក់បរទេស
  • ដោយមានបំណងឱ្យការផ្ទេរអំណាចដឹកនាំប្រទេស ធ្វើទៅបានរលូនតាមគន្លងប្រជាធិបតេយ្យ
  • ដោយយល់ច្បាស់ថាប្រទេសកម្ពុជា បោះជំហ៊ានដល់របត់កែប្រែមួយសំខាន់បំផុតក្នុងប្រវត្ដិសាស្ដ្រ
  • ប្រជាពលរដ្ឋខ្មែរ ដែលមានទស្សនៈនិងជំនឿប្រហាក់ប្រហែលគ្នា ពុះពោរដោយឆន្ទៈ និងការប្ដេជ្ញា ចិត្ដ យ៉ាងមោះមុត បូជាកំលាំងកាយចិត្ដ រកវិធីកែប្រែផ្នត់គំនិតរបស់មនុស្សក្នុងសង្គមយើង បានជួបប្រជុំគ្នា ពិភាក្សា គិតពិចារណាពីស្ថានភាព និងជីវភាពសង្គម រហូតដល់ព្រមព្រៀងគ្នា​ជាឯកច្ឆន្ទ សម្រេចបង្កើត គណបក្ស សម្ព័ន្ធដើម្បីប្រជាធិបតេយ្យ ដើម្បីចូលរួមដឹកនាំកសាង​ប្រទេសដោយគោរពគោលការណ៍រាស្ដ្រជាម្ចាស់អំណាច និងមិនទុកឱ្យមនុស្សម្នាក់ ឬ ជនមួយ ​ក្រុមតូច ក្ដាប់អំណាចសម្រេចវាសនាប្រទេសជាតិជំនួសប្រជាពលរដ្ឋ។ ការប្រជុំដូចពោល​ខាង​លើព្រមដោយការពិគ្រោះយោបល់ក្នុងស្រទាប់ប្រជាពលរដ្ឋខ្លះបានសម្រេចចេញជាអត្ថបទ​​លក្ខន្ដិកៈដូចតទៅ ៖
    ជំពូក ១
    បញ្ញត្ដិទូទៅ
    មាត្រា ១ ៖
    គណបក្ស សម្ព័ន្ធដើម្បីប្រជាធិបតេយ្យ អក្សរកាត់ “ គ. ស. ប. ” ដែល បានបង្កើតឡើងដោយប្រជាពលរដ្ឋខ្មែរ នៅថ្ងៃទី១៥ ខែកក្កដា ឆ្នាំ២០០៥ ។
    មាត្រា 2 ៖
    គណបក្ស សម្ព័ន្ធដើម្បីប្រជាធិបតេយ្យ ប្រព្រឹត្ដទៅក្នុងក្របខ័ណ្ឌរដ្ឋ ធម្មនុញ្ញនៃព្រះរាជាណាចក្រកម្ពុជា។
    មាត្រា 3 ៖
    គណបក្ស សម្ព័ន្ធដើម្បីប្រជាធិបតេយ្យ មានទីស្នាក់ការកណ្ដាល តាំងនៅ រាជធានីភ្នំពេញ ផ្ទះលេខ៣០ ផ្លូវលេខ៦០៨ សង្កាត់បឹងកក់២ ខណ្ឌទួល គោក រាជធានីភ្នំពេញ។ ទីស្នាក់ការនេះអាចផ្លាស់ប្ដូរទៅទីកន្លែងផ្សេងបាន តាមការសំរេចរបស់គណៈអចិន្ដ្រៃយ៍។
    - សាខានៅទូទាំងប្រទេស និងតាមប្រទេសនានាលើសាកលលោក ដែល មានជនជាតិខ្មែររស់នៅ ដោយផ្អែកតាម សំណូមពររបស់ប្រជាពលរដ្ឋ និង តាមការសម្រេចរបស់គណៈអចិន្ដ្រៃយ៍ ។
    មាត្រា 4 ៖ គណបក្ស សម្ព័ន្ធដើម្បីប្រជាធិបតេយ្យ មានរូប “ ជួង ” ជាសញ្ញាសម្គាល់ និងមានបាវចនា ៖ “រួមគិត រួមសម្រេច រួមធ្វើ”។

    ជំពូក ២
    គោលជំហរនយោបាយ
    មាត្រា 5 ៖ គណបក្ស សម្ព័ន្ធដើម្បីប្រជាធិបតេយ្យ មានគោលជំហរនយោបាយ ដូចតទៅ ៖
    • គោរពគោលការណ៍ ប្រជាពលរដ្ឋជាម្ចាស់អំណាច ត្រួតត្រា ដឹកនាំ ប្រទេសដោយសន្ដិភាព ឯករាជ្យ មានបូរណភាព ទឹកដីពេញលេញ និងលើកស្ទួយកិត្យានុភាពជាតិ ក្នុងសហគមន៍សកលលោក។
    • ពង្រឹងនិងពង្រីកនូវចំណេះដឹង ផ្នែកបច្ចេកទេស សីលធម៌សង្គម ដល់ ប្រជាពលរដ្ឋទូលំទូលាយ ដោយកំណត់ការអភិវឌ្ឍន៍ធនធានមនុស្ស ជាអាទិភាព។
    • ប្រកាន់ខ្ជាប់គោលការណ៍ “ រួមគិត រួមសម្រេច រួមធ្វើ ” ដើម្បីស្ដារ និង កសាងជាតិខ្មែរឈានទៅដល់ភាពសំបូរសប្បាយ ឱ្យបានឆាប់ រហ័ស។
    • ចាត់វិធានការម៉ឺងម៉ាត់ ធានាប្រសិទ្ធភាពនិតិរដ្ឋ និងបែងចែកចំណូល រដ្ឋ សមស្របតាមអាទិភាពដើម្បីបំរើសេវាសាធារណៈ ជូនប្រជាពល រដ្ឋទូទៅ។
    • ជួយឱ្យយុវជន បញ្ញវ័ន្ដ មានលក្ខណសម្បត្ដិល្អប្រសើរ បន្ដវេនកាន់ កាប់កិច្ចការប្រទេសជាតិ។
    • រក្សាមិត្ដភាព ចំណងទាក់ទងល្អជាមួយប្រទេស និងប្រជាជាតិលើ សកលលោក ឈរលើគោលការណ៍ស្មើភាព គោរពសិទ្ធិ និងផល ប្រយោជន៍ទៅវិញទៅមក។
    ជំពូក ៣
    សមាជិកភាព សិទ្ធិ និងករណីយកិច្ច
    មាត្រា ៦ ៖
    គណបក្ស សម្ព័ន្ធដើម្បីប្រជាធិបតេយ្យ គឺជាអង្គការមួយ​ដែល​ប្រមូល​ផ្ដុំ​ប្រជាពល​រដ្ឋ​ខ្មែរ​ពីគ្រប់មជ្ឈដ្ឋាន ដែលស្រលាញ់ សេរីភាព គោរព​សិទ្ធិ​មនុស្ស​ និងប្រជាធិបតេយ្យហើយរួបរួមគ្នាធ្វើការដើម្បីគោលដៅរួម ដែល​មាន​ចែង​ក្នុងបុព្វកថា។ ប្រជាពលរដ្ឋគ្រប់រូបដែលមានអាយុពី ១៨ឆ្នាំ​ឡើង​ទៅអាចចូលជាសមាជិករបស់គណបក្សបានតាមនីតិវិធី ដែលមានចែង ក្នុងបទបញ្ជាផ្ទៃក្នុង ។
    មាត្រា ៧ ៖
    សមាជិករបស់គណបក្សបែងចែកជា ៣ ប្រភេទ ៖
    - សមាជិកស្ថាបនិក
    - សមាជិកសកម្ម
    - សមាជិកឧបត្ថម្ភ
    មាត្រា ៨ ៖
    សមាជិកស្ថាបនិក គឺជាសមាជិកទាំងឡាយណាដែលបានផ្ដើម​គំនិត​បង្កើត​គណបក្ស​ មុនថ្ងៃប្រកាស គណបក្សជាផ្លូវការនៅរាជធានីភ្នំពេញ ។
    មាត្រា ៩ ៖ សមាជិកសកម្ម គឺជាសមាជិកទាំងឡាយណា ដែលចូលជាសមាជិក​របស់​គណបក្ស​ ហើយបញ្ចេញសកម្មភាពការងារគាំទ្រ និងធ្វើការដើម្បី​គណបក្ស​ឱ្យ​បានរីកចម្រើនលូតលាស់។
    មាត្រា ១០ ៖
    សមាជិកឧបត្ថម្ភ គឺជាសមាជិកដែលបានធ្វើអំណោយដល់គណបក្ស ។
    មាត្រា ១១ ៖
    សមាជិកគ្រប់រូបនៃគណបក្ស មានសិទ្ធិស្មើគ្នា។ សមាជិកគ្រប់​រូប​របស់​គណបក្ស​ មានសិទ្ធិបញ្ចេញមតិតវ៉ា អនុលោមទៅតាមនីតិវិធី ដែលមាន​ចែង​ក្នុង​បទបញ្ជាផ្ទៃក្នុង។
    មាត្រា ១២ ៖
    សមាជិកគ្រប់រូបនៃគណបក្ស មានករណីយកិច្ចគោរពលក្ខន្ដិកៈ បទបញ្ជា​ផ្ទៃ​ក្នុង​ សេចក្ដីសំរេច និងគោលនយោបាយទាំងអស់របស់គណបក្ស ។
    មាត្រា ១៣ ៖
    សមាជិកគណបក្សអាចបាត់បង់សមាជិកភាពទៅវិញដោយ ៖
    - មរណភាព
    - ការសុំលាលែង
    - ការលុបឈ្មោះចេញពីគណបក្ស
    នីតិវិធីនៃការលុបឈ្មោះចេញពីគណបក្សមានចែងនៅក្នុងបទបញ្ជាផ្ទៃក្នុង ។
    មាត្រា ១៤ ៖
    គ្មានសមាជិកណាម្នាក់អាចយកឈ្មោះ គណបក្ស សម្ព័ន្ធ​ដើម្បី​ប្រជា​ធិប​តេយ្យ​ ទៅប្រើប្រាស់ ដើម្បីផលប្រយោជន៍ ផ្ទាល់ខ្លួន ឬបំបែក​គណបក្ស​បាន​ឡើយ។

    ជំពូក 4
    ធនធានគណបក្ស
    មាត្រា ១៥ ៖
    ធនធានគណបក្សបានមកពី ៖
    - វិភាគទាន នឹងភាគទានរបស់សមាជិក
    - អំណោយស្របច្បាប់ពីគ្រប់មជ្ឈដ្ឋាន
    - សកម្មភាពស្របច្បាប់ក្នុងគ្រប់វិស័យ

    ជំពូក ៥
    រចនាសម្ព័ន្ឋរបស់គណបក្ស
    មាត្រា ១៦ ៖
    រចនាសម្ព័ន្ធរបស់គណបក្សត្រូវបានរៀបចំជា ៖
    ក- សមាជគណបក្ស
    ខ- ក្រុមប្រឹក្សាមូលដ្ឋាន
    គ- គណៈកម្មាធិការនាយក
    ឃ- គណៈអចិន្ដ្រៃយ៍
    ង- ក្រុមប្រឹក្សាវិន័យ

    ផ្នែកទី ១ ៖ សមាជគណបក្ស
    មាត្រា ១៧ ៖ សមាជ គឺជាស្ថាប័នដឹកនាំខ្ពស់បំផុតរបស់គណបក្ស មានពីរប្រភេទគឺសមាជសាមញ្ញ និងសមាជវិសាមញ្ញ ដែលប្រារឰធ្វើ ក្រោមអធិបតីភាព ប្រធានគណៈកម្មការសមាជ។
    • សមាជសាមញ្ញ នឹងប្រារឰធ្វើ រៀងរាល់ ៤ ឆ្នាំម្ដង។ កាលបរិច្ឆេទ នៃសមាជនេះ នឹងកំណត់ដោយ គណៈកម្មាធិការនាយកក្នុងពេលប្រជុំពេញអង្គ ហើយផ្សព្វផ្សាយយ៉ាងតិច៦០ថ្ងៃមុនពេលសមាជ។
    • គណៈអចិន្ដ្រៃយ៍អាចស្នើលើកពេលសមាជ ដោយបញ្ជាក់ហេតុផលដាក់ជូនគណៈកម្មាធិការនាយក សម្រេចតាមនីតិវិធីដូចមានងែក្នុងបទបញ្ជាផ្ទៃក្នុង។ ការសម្រេចនេះត្រូវផ្សព្វផ្សាយ ដល់ការិយាល័យ ខេត្ដ/ក្រុង និង ឃុំ/សង្កាត់។ ក្នុងករណីនេះ អាណត្ដិរបស់ក្រុមប្រឹក្សាមូលដ្ឋាន គណៈកម្មាធិការនាយក គណៈអចិន្ដ្រៃយ៍ ត្រូវបានពន្យាពេលដល់ ពេលមានសមាជ។
    • សមាជវិសាមញ្ញនឹងប្រារឰធ្វើឡើង ទៅតាមមតិស្នើសុំ ៥០% + ១ របស់គណៈអចិន្ដ្រៃយ៍ ឬ មតិពីរភាគបី នៃ គណៈកម្មាធិការនាយក ។
    មាត្រា ១៨ ៖
    គណៈកម្មការសមាជ មានសមាសភាព ៥រូប ក្នុងនោះមានសមាជិក ២រូប ជ្រើសតាំងដោយ គណៈអចិន្ដ្រៃយ៍ និង សមាជិក ៣រូបទៀត ជ្រើសតាំងដោយគណៈកម្មាធិការនាយក។ គណៈកម្មការសមាជជ្រើសរើស ប្រធានមួយរូប និង អនុប្រធានមួយរូបក្នុងចំណោមសមាជិករបស់ខ្លួន។ តួនាទី ភារៈកិច្ច របស់គណៈកម្មការសមាជ មានចែងក្នុងបទបញ្ជា ផ្ទៃក្នុង។ គណៈកម្មការសមាជត្រូវរំសាយក្រោយពេលកិច្ចការសមាជបានបព្ចាប់ ។
    មាត្រា ១៩ ៖​
      សមាជិកពេញសិទ្ធិនៃសមាជគណបក្សមាន ៖
      - ក្រុមប្រឹក្សាមូលដ្ឋាន
      - គណៈកម្មាធិការនាយក និង គណៈអចិន្ដ្រៃយ៍
      - ប្រធាននិងអនុប្រធាននាយកដ្ឋាននីមួយៗ
      - ប្រតិភូ តំណាង សាខាគណបក្សនៅបរទេស/ចលនាយុវជនខ្មែរ/ចលនាស្ដ្រីខ្មែរ/បញ្ញវ័ន្ដ និងពលករខ្មែរ
      - ទីប្រឹក្សាប្រធានគណបក្ស
    មាត្រា ២០ ៖​
    សមាជមានភារកិច្ច ៖
      • អនុម័តរបាយការណ៍របស់គណៈកម្មាធិការនាយក។
      • កំណត់ទិសដៅ យុទ្ធសាស្ដ្រនិងគោលនយោបាយរបស់គណបក្ស។
      • ជ្រើសតាំងក្រុមប្រឹក្សាមូលដ្ឋាន តាមរយៈការបោះឆ្នោតសម្ងាត់។
      • ធ្វើវិសោធនកម្មលក្ខន្ដិកៈ/កែប្រែរចនាសម្ព័ន្ធ/កែប្រែឈ្មោះរបស់​គណបក្ស និងរំលាយគណបក្ស។
    មាត្រា ២១ ៖​
    សមាជទាំងពីរប្រភេទអាចប្រារឰធ្វើឡើងបាន លុះត្រាតែមានចំនួនកូរ៉ុម ពីរភាគបី នៃសមាជិកពេញសិទ្ធិរបស់សមាជ។ រូបមន្ដនៃការសំរេចតាមមតិ ៥០% + ១ លើកលែងតែការធ្វើវិសោធនកម្មលក្ខន្ដិកៈ ឬរំលាយគណបក្សត្រូវយករូបមន្ដនៃ ការសំរេចដោយមតិពីរភាគបី នៃសមាជិកចូលរួម។
    មាត្រា ២២ ៖​
    ក្រុមប្រឹក្សាមូលដ្ឋាន គឺជាស្ថាប័នតំណាងសមាជរបស់គណបក្ស សម្រាប់អាណត្ដិ៤ឆ្នាំ ។
    សមាសភាពនៃក្រុមប្រឹក្សាមូលដ្ឋាន គឺ ៖
    - សមាជិកជាតំណាងខេត្ដ / ក្រុង
    - សមាជិកជាតំណាងប្រជាពលរដ្ឋខ្មែរនៅបរទេស
    - សមាជិកជាតំណាងចលនាយុវជនខ្មែរនិងចលនាស្ដ្រីខ្មែរ
    - សមាជិកផ្សេងៗទៀតដែលសមាជ បានបោះឆ្នោតជ្រើសតាំង តាមសំណើ របស់គណៈអចិន្ដ្រៃយ៍ ដែលមាន ចំនួន មិនលើសពី មួយភាគបួននៃក្រុមប្រឹក្សាមូលដ្ឋាន។
    មាត្រា ២៣៖​
    ក្រុមប្រឹក្សាមូលដ្ឋានមានភារកិច្ច ៖
  • ត្រួតពិនិត្យការអនុវត្ដន៍ទិសដៅនិងនយោបាយដែលសមាជបានកំណត់។
  • សម្រេចលើកិច្ចការទាំងឡាយដែលសមាជិករបស់ខ្លួនចំនួនមួយភាគបី ឬ គណៈកម្មាធិការនាយកដាក់ជូនពិនិត្យ ។

  • ជ្រើសរើសក្នុងចំណោមសមាជិករបស់ខ្លួនតាមរយៈ​ការ​បោះឆ្នោត​ជា​សម្ងាត់​នូវ សមាជិក គណៈកម្មាធិការនាយក ។

  • អនុម័តលើបេក្ខភាព សមាជិកក្រុមប្រឹក្សាវិន័យ ដែលស្នើឡើងដោយគណៈអចិន្ដ្រៃយ៍ ។
    • មាត្រា ២៤៖​
    ក្រុមប្រឹក្សាមូលដ្ឋានប្រជុំគ្នា ១ឆ្នាំម្ដង ដោយមានចំនួនកូរ៉ុមលើសពី៥០%នៃសមាជិករបស់ខ្លួន និងដឹកនាំដោយប្រធាន គណបក្ស។ ក្នុងករណីប្រធានពុំអាចដឹកនាំការប្រជុំបានអនុប្រធានគណបក្សត្រូវដឹកនាំការប្រជុំ។ ការប្រជុំ់វិសាមញ្ញអាចត្រូវបានស្នើសុំតាមមតិ ៥០% + ១ នៃសមាជិកគណៈកម្មាធិការនាយក ឬមតិស្នើសុំ ៥០% + ១ នៃក្រុមប្រឹក្សាមូលដ្ឋាន ។ ការសំរេចគឺយកតាមរូបមន្ដ ៥០% + ១ នៃអ្នកចូលរួម។ ក្រុមប្រឹក្សាមូលដ្ឋានចាស់ចប់អាណត្ដិនៅពេលក្រុមប្រឹក្សាមូលដ្ឋានថ្មីកើតឡើង។
    មាត្រា ២៥៖​
    ការបង្កើតនិងដំណើរការប្រព្រឹត្ដទៅនៃក្រុមប្រឹក្សាមូលដ្ឋាន ត្រូវចែងក្នុងបទបញ្ជាមួយដោយឡែក។
    ផ្នែកទី ៣ ៖ គណៈកម្មាធិការនាយក
    មាត្រា ២៦ ៖

    គណៈកម្មាធិការនាយក គឺជាស្ថាប័នដឹកនាំ ត្រួតពិនិត្យ សំរេចរបស់ គណបក្ស​ក្នុងរយៈពេល​ពីសមាជមួយទៅសមាជមួយទៀត។​ គណៈកម្មាធិការនាយកត្រូវ​បានជ្រើសរើសដោយក្រុមប្រឹក្សាមូលដ្ឋានក្នុងចំណោមសមាជិករបស់ខ្លួនតាមសំណើ របស់ គណៈអចិន្ដ្រៃយ៍ចាស់សម្រាប់អាណត្ដិ ៤ឆ្នាំ ។

    មាត្រា ២៧ ៖

    គណៈកម្មាធិការនាយកមានភារកិច្ច ៖

      • អនុវត្ដ និងត្រួតពិនិត្យការអនុវត្ដតាមទិសដៅ តាមបន្ទាត់នយោបាយ និងតាមវិន័យរបស់គណបក្ស ដែលសមាជបានអនុម័ត។
      • អនុវត្ដសេចក្ដីសំរេចរបស់ក្រុមប្រឹក្សាមូលដ្ឋាន។
      • ធានាដំណើរការ និងគ្រប់គ្រងសកម្មភាពរបស់គណបក្ស។
      • បង្កើត និងកែប្រែ បទបញ្ជាផ្ទៃក្នុង ឬ បទបញ្ញត្ដិផ្សេងៗ ឱ្យស្របតាមលក្ខន្ដិកៈ ។

    មាត្រា ២៨ ៖

      គណៈកម្មាធិការនាយក គឺជាស្ថាប័នដឹកនាំ ត្រួតពិនិត្យ សំរេចរបស់ គណបក្ស​ក្នុងរយៈពេល​ពីសមាជមួយទៅសមាជមួយទៀត។​ គណៈកម្មាធិការនាយកត្រូវ​បានជ្រើសរើសដោយក្រុមប្រឹក្សាមូលដ្ឋានក្នុងចំណោមសមាជិករបស់ខ្លួនតាមសំណើ របស់ គណៈអចិន្ដ្រៃយ៍ចាស់សម្រាប់អាណត្ដិ ៤ឆ្នាំ ។

    មាត្រា ២៩ ៖​
    គណៈកម្មាធិការនាយកប្រជុំបាន ត្រូវមានចំនួនកូរ៉ុមលើសពី៥០ភាគរយ នៃសមាជិករបស់ខ្លួន។ រាល់ការសំរេចតាមមតិ ៥០%៎១ នៃសមាជិកចូលរួម។
    មាត្រា ៣០ ៖

    បេក្ខជនប្រធាន និង អនុប្រធានត្រូវជ្រើសរើសតាមការបោះឆ្នោតលើបញ្ជីឈ្មោះតែមួយ។ ក្នុងបញ្ជីនីមួយៗ មានឈ្មោះ ប្រធាន អនុប្រធាន។

    មាត្រា ៣១ ៖

    ក្រុមប្រធានគណបក្ស គឺជាប្រធានក្រុមប្រឹក្សាមូលដ្ឋាន ប្រធានគណៈកម្មាធិការនាយក និងប្រធានគណៈអចិន្ដ្រៃយ៍។

    មាត្រា ៣២ ៖​
    សមាជិកគណៈកម្មាធិការនាយក ចំនួនមួយភាគបីមានសិទ្ធិអញ្ជើញ គណៈប្រធាន ឬសមាជិកណាម្នាក់ក្នុងគណៈអចិន្ដ្រៃយ៍ មកប្រជុំសួរដេញដោលលើបញ្ហាដែលទាក់ទងដល់រាល់ការសំរេចរបស់ខ្លួន។ ក្នុងករណីការសម្រេចមានកំហុសឆ្គងធ្ងន់ធ្ងរ សាម៉ីខ្លួនអាចស្នើសុំលាលែងពីតួនាទី ឬ សមាជិកគណៈកម្មាធិការនាយកចំនួន ៥០%៎១ អាចស្នើទៅក្រុមប្រឹក្សាវិន័យ ពិនិត្យវិនិច្ឆ័យតាមនីតិវិធី។
    មាត្រា ៣៣ ៖
    ប្រធានគណបក្សដឹកនាំគណបក្សបានតែពីរអាណត្ដិ។ ក្នុងករណីមានសំណូមពរ ៥០%+១ ពីគណៈអចិន្ដ្រៃយ៍ និងទទួល ការយល់ព្រមដោយសម្លេង ពីរភាគបីនៃគណៈកម្មាធិការនាយក អាណត្ដិប្រធានអាចបន្ដបានម្ដងទៀត ហើយគ្មានការ បន្ដជាលើកទី២។

    ផ្នែកទី ៤ ៖ គណៈអចិន្ដ្រៃយ៍
    មាត្រា ៣៤ ៖

    គណៈប្រធានគណបក្សត្រូវជ្រើសរើស គណៈអចិន្ដ្រៃយ៍ក្នុងចំណោម សមាជិកគណៈកម្មាធិការនាយក។ សមាសភាពគណៈអចិន្ដ្រៃយ៍មាន ៖

    - ប្រធាន គណបក្ស ៖   មួយរូប
    - អនុប្រធាន គណបក្ស ៖   មួយរូប
    - អគ្គលេខាធិការ គណបក្ស ៖   មួយរូប
    - អគ្គលេខាធិការរង គណបក្ស ៖   ទី១មួយរូប ទី២មួយរូប
    - អគ្គហេរញ្ញិក គណបក្ស ៖   មួយរូប
    - អគ្គហេរញ្ញិករង ៖   មួយរូប
    - សមាជិកគណៈកម្មាធិការនាយក ៖   ពីររូប
    ការតែងតាំងគណៈអចិន្ដ្រៃយ៍ត្រូវមានការយល់ព្រមពីមតិភាគច្រើនរបស់គណៈកម្មា ធិការនាយក តាមរយៈការបោះឆ្នោត ដោយយកចិត្ដទុកដាក់លើបេក្ខនារីជាអាទិភាព។
    មាត្រា ៣៥ ៖
    គណៈអចិន្ដ្រៃយ៍មានភារកិច្ច ៖
    - ដឹកនាំចាត់ចែងនិងអនុវត្ដកិច្ចការប្រចាំថ្ងៃរបស់គណបក្ស
    - រៀបចំគម្រោងយុទ្ធសាស្ដ្រដាក់ជូន គណៈកម្មាធិការនាយកពិនិត្យ មុននឹងស្នើសុំការអនុម័តពីក្រុមប្រឹក្សាមូលដ្ឋាន ឬអង្គសមាជ។
    - សិក្សា និង វាយតម្លៃសភាពការណ៍ នយោបាយជាតិ អន្ដរជាតិព្រមទាំងកិច្ចការគណបក្ស ។
    មាត្រា ៣៦ ៖
    គណៈអចិន្ដ្រៃយ៍ជួបប្រជុំយ៉ាងតិច ១ ដងក្នុងមួយសបា្ដហ៍ ដោយមានចំនួនកូរ៉ុម ៥០%+១ ។
    មាត្រា ៣៧ ៖
    គណៈអចិន្ដ្រៃយ៍ ស្នើបេក្ខភាពប្រធាន និង អនុប្រធាននាយកដ្ឋានជំនាញ ដោយជ្រើសរើសចេញពី គណៈកម្មាធិការនាយក ជាអាទិភាពដាក់ជូនគណៈកម្មាធិការនាយកសម្រច។ ក្នុងករណីមិនគ្រប់ចំនួន គណៈអចិន្ដ្រៃយ៍អាចជ្រើសរើសបេក្ខភាពចេញពីអ្នកជំនាញ ។
    មាត្រា ៣៨ ៖
    ប្រធានគណបក្សដឹកនាំអង្គប្រជុំគណៈកម្មាធិការនាយក និង អង្គប្រជុំគណៈអចិន្ដ្រៃយ៍ ។ នៅពេលអវត្ដមានប្រធាន អនុប្រធានជាអ្នកដឹកនាំអង្គប្រជុំ ។ ក្នុងករណីអវត្ដមានគណៈប្រធាន អគ្គលេខាធិការជាអ្នកដឹកនាំអង្គប្រជុំ។
    មាត្រា ៣៩ ៖
    ប្រធានគណបក្សមានសិទ្ធិតែងតាំង ឬដកតាមតម្រូវការនូវទីប្រឹក្សារបស់ខ្លួន ដែលចំនួនមិនលើសពី ចំនួនក្រសួងដែល មាននៅក្នុងរដ្ឋាភិបាល។
    មាត្រា ៤០ ៖
    អនុប្រធានគណបក្ស ទទួលភារកិច្ចតាមការកំណត់របស់ប្រធាន។ នៅពេលអវត្ដមានប្រធាន អនុប្រធានបំពេញភារកិច្ចជាប្រធានស្ដីទី ។
    មាត្រា ៤១ ៖
    ក្នុងករណី ប្រធានគណបក្សបាត់បង់សមត្ថភាពដឹកនាំ ដែលបញ្ជាក់ដោយគណៈកម្មាធិការនាយក អនុប្រធានគណបក្ស ត្រូវទទួលតួនាទីជាប្រធានគណបក្សស្ដីទី។ ក្នុងរយៈពេល៣០ថ្ងៃ យ៉ាងយូរ គណៈកម្មាធិការនាយកត្រូវកោះការប្រជុំ ដើម្បីជ្រើសរើសប្រធានគណបក្សថ្មី។ បេក្ខជនដែលទទួលសំលេងគាំទ្រច្រើនជាងគេ ត្រូវជាប់ជាប្រធានគណបក្ស ដឹកនាំ គណបក្សដល់ពេលមានសមាជ។
    មាត្រា ៤២ ៖
    គណៈប្រធានគណបក្ស ឬសមាជិកគណៈកម្មាធិការនាយក ចំនួនមួយភាគបីអាចស្នើបេក្ខភាព អគ្គលេខាធិការ អគ្គហេរញ្ញិក អគ្គហេរញ្ញិករង គណបក្សដើម្បីដាក់ជូនគណៈកម្មាធិការនាយកសំរេច ។
    មាត្រា ៤៣ ៖
    អគ្គលេខាធិការស្នើបេក្ខភាពអគ្គលេខាធិការរងទាំងពីររូប ដើម្បីដាក់ជូនគណៈកម្មាធិការនាយកសំរេច ។
    មាត្រា ៤៤ ៖
    អគ្គលេខាធិការអមដោយអគ្គលេខារងពីររូបមានភារកិច្ច ៖
    • គ្រប់គ្រងការងាររដ្ឋបាលរបស់គណបក្ស

    • គ្រប់គ្រងសកម្មភាពរបស់នាយកដ្ឋាននានា ធានាទំនាក់ទំនងជាមួយសាខានៅក្នុងនិងក្រៅប្រទេស ។

    • រៀបចំរបៀបវារៈ និងអញ្ជើញគណៈអចិន្ដ្រៃយ៍ គណៈកម្មាធិការនាយក ចូលរួមប្រជុំតាមការឯកភាព ពីគណៈប្រធាន។

    • គ្រប់គ្រងត្រួតពិនិត្យលើការប្រើប្រាស់ចលនទ្រព្យ និង អចលនទ្រព្យរបស់គណបក្ស។
    មាត្រា ៤៥ ៖
    អគ្គហេរញ្ញិកអមដោយអគ្គហេរញ្ញិករងមានភារកិច្ច គ្រប់គ្រងថវិកា សេដ្ឋកិច្ច និងទ្រព្យសម្បត្ដិរបស់គណបក្ស។ អគ្គហេរញ្ញិកត្រូវធ្វើរបាយការណ៍ហិរញ្ញវត្ថុប្រចាំខែជូនគណៈអចិន្ដ្រៃយ៍សម្រេច និងរបាយការណ៍ប្រចាំត្រីមាសដាក់ជូន គណៈកម្មាធិការនាយកសំរេច។ របៀបរបបគ្រប់គ្រងថវិកាត្រូវកំណត់ក្នុងបទបញ្ជាមួយដោយឡែក ។

    ផ្នែកទី ៥ ៖ ក្រុមប្រឹក្សាវិន័យ
    មាត្រា ៤៦ ៖

    គណៈប្រធានគក្រុមប្រឹក្សាវិន័យ មានសមាជិក៥នាក់ ដែលជ្រើសរើសចេញពីសមាជិកគណៈកម្មាធិការនាយក និងមានការយល់ព្រមពីក្រុមប្រឹក្សាមូលដ្ឋានតាមការស្នើសុំរបស់គណៈអចិន្ដ្រៃយ៍។ ក្រុមប្រឹក្សាវិន័យត្រូវបោះឆ្នោតជ្រើសរើសក្នុងចំណោម សមាជិករបស់ខ្លួននូវប្រធានមួយរូប និង អនុប្រធានមួយរូបសម្រាប់សម្របសម្រួលរាល់ការងាររបស់ក្រុមប្រឹក្សាវិន័យ។ ក្រុមប្រឹក្សាវិន័យចាស់ចប់អាណត្ដិនៅពេលក្រុមប្រឹក្សាវិន័យថ្មីត្រូវបានជ្រើសរើស។

    មាត្រា ៤៧ ៖
    ក្រុមប្រឹក្សាវិន័យមានភារកិច្ចដោះស្រាយរាល់ជម្លោះផ្ទៃក្នុងរបស់គណបក្ស តាមសំណើជាលាយលក្ខណ៍អក្សររបស់ ស្ថាប័ន ឬការិយាល័យណាមួយនៃគណបក្ស។
    មាត្រា ៤៨ ៖
    ក្រុមប្រឹក្សាវិន័យត្រូវមានសមាជិកចូលរួមយ៉ាងតិច៣នាក់ ទើបអាចប្រជុំបាន។ ការសំរេចយកតាមមតិ ៥០%៎១ នៃ សមាជិកចូលរួម។
    មាត្រា ៤៩ ៖
    គណៈអចិន្ដ្រៃយ៍ ស្នើបេក្ខភាពប្រធាន និងអនុប្រធាននាយកដ្ឋានជំនាញ ដោយជ្រើសរើសចេញពីគណៈកម្មាធិការនាយក ជាអាទិភាពដាក់ជូនគណៈកម្មាធិការនាយកសម្រច។ ក្នុងករណីមិនគ្រប់ចំនួន​ គណៈអចិន្ដ្រៃយ៍អាចជ្រើសរើសបេក្ខភាពចេញពីអ្នកជំនាញ ។
    មាត្រា ៥០ ៖
    ប្រសិនបើសេចក្ដីសម្រេចណាមួយ មិនមានការយល់ព្រមពីគណៈអចិន្ដ្រៃយ៍ទេ គណៈអចិន្ដ្រៃយ៍អាចធ្វើសំណើទៅ ក្រុមប្រឹក្សាវិន័យប្រជុំ ធ្វើការសំរេចជាថ្មីដោយមានវត្ដមានតំណាងគណៈអចិន្ដ្រៃយ៍ពីររូប។
    មាត្រា ៥១ ៖
    ប្រសិនបើសេចក្ដីសម្រេចចុងក្រោយនៅតែមិនមានការឯកភាព ពីគណៈអចិន្ដ្រៃយ៍ ក្រុមប្រឹក្សាវិន័យត្រូវស្នើសេចក្ដី សម្រេច ពីអង្គប្រជុំវិសាមញ្ញរបស់គណៈកម្មាធិការនាយក ហើយការសម្រេចរបស់អង្គប្រជុំនេះ គឺជាសេចក្ដីសម្រេចស្ថាពរបិទផ្លូវតវ៉ា។

    ជំពូក ៦
    ការកែប្រែលក្ខន្ដិកៈនិងការរំលាយគណបក្ស
    មាត្រា ៥២ ៖
    សមាជគណបក្សជាស្ថាប័នតែ១គត់ ដែលមានសមត្ថកិច្ចធ្វើវិសោធនកម្មលក្ខន្ដិកៈ ឬ រំលាយគណបក្សតាមសំឡេង ពីរភាគបី នៃសមាជិកចូលរួម ។
    មាត្រា ៥៣ ៖
    ក្នុងករណីគណបក្សត្រូវរំលាយ ទ្រព្យសម្បត្ដិសេសសល់ក្រោយពីការជម្រះបញ្ជីរួចហើយត្រូវ ចាត់ចែងតាមសេចក្ដីសំរេច របស់អង្គសមាជ។

    ជំពូក ៧
    ការកែប្រែលក្ខន្ដិកៈនិងការរំលាយគណបក្ស
    មាត្រា ៥៤ ៖
    គណៈអចិន្ដ្រៃយ៍ស្ថាបនិក ស្នើបេក្ខភាពគណៈកម្មាធិការនាយក និងក្រុមប្រឹក្សាវិន័យដាក់ជូនសមាជលើកទី១។
    មាត្រា ៥៥ ៖
    គណៈអចិន្ដ្រៃយ៍ស្ថាបនិកកំណត់ចំនួនសមាជិកសមាជលើកទី១ និងកោះអញ្ជើញសមាជលើកទី១។

    ជំពូក ៨
    អវសានបញ្ញតិ
    មាត្រា ៥៦ ៖
    លក្ខន្ដិកៈនេះបានធ្វើវិសោធនកម្មនៅថ្ងៃទី.........ខែ...................ឆ្នាំ ២០០៧ និង មានសុពលភាពគតិយុត្ដិ ចាប់ពីថ្ងៃ ចុះហត្ថលេខាដោយប្រធានគណបក្សនេះតទៅ។

    ទៅលើ
រក្សា​សិទ្ធិ​គ្រប់យ៉ាង​ ដោយគណបក្ស​សម្ព័ន្ធ​ដើម្បី​ប្រជាធិតេយ្យ ឆ្នាំ២០០៨
រៀបចំដោយ ក្រុម​ ខេមអ៊ីត (CAMiT)

Visitor: 53974